Amman

Amman
Nitya subha mangalam

Friday, November 2, 2012

హృదయం పావన గౌతమీ తటమ్ - 2

పీఠికా పురం - పిఠాపురం
ఇది దేవ భూమి. ఇక్కడి ప్రతి అణువు దైవం నడయాడిన పవిత్ర భూమి.



పిఠాపురం లో మొదట శ్రీ పాద వల్లభ సంస్థానానికి వెళ్ళాము. ఇప్పటి వరకు దత్తాత్రేయ స్వామి మొదలుకొని షిర్డీ సాయిబాబా వరకు ఉన్న గురు పరంపర లో, శ్రీ పాద వల్లభ స్వామి అవతారం విశేషం అయినది. పిఠాపురం లో దత్తాత్రేయ అంశగా ఒక పుణ్య దంపతులకి జన్మించి, గురు స్వరూపమై ఎందరో సామాన్యులను ఉద్ధరించి, వేదోక్తమైన జీవనాన్ని - ధర్మాన్ని నిలిపి, జీవుల కర్మలను బాపి, గానుగా పురం లో నివశించిన స్వామి ఆయన. స్వామి జన్మించిన ఇల్లు ఇప్పటి మహా సంస్థానం. ఆ సంస్థానం లో ఉచిత వసతి, నిత్య అన్నదానం జరుగుతూ ఉంటాయి. ఆయన నీడలో ఎందరో దుఃఖం అనే మాటని పూర్తి గా మరచి ఆనంద సముద్రం లో ఓలలాడుతున్నారు. అక్కడ కొన్ని గంటలు ప్రశాంతత పరుచుకున్న వాతావరణం లో గడిపాము. అక్కడ ఔదుమ్బర వృక్షానికి ప్రదక్షిణ చేశాము.




 అక్కడ నుంచి పంచ మాధవ క్షేత్రాలలో  ఒకటి అయిన కుంతీ మాధవ స్వామి ఆలయానికి వెళ్ళాము. అతి ప్రాచీనమైన అద్భుతమైన గుడి అది, యుగ యుగాల నాటి ఆలయం అది.

"అధరం మధురం నయనం మధురం
వదనం మధురం వచనం మధురం
చరణం మధురం మధురమే మధురం
శ్రీ మధురాధిపతే అఖిలం మధురం"



అక్కడి నుంచి స్వయంభూ కుక్కుటేశ్వర స్వామి, పురుహుతాంబ శక్తి పీఠం, స్వయంభూ దత్తాత్రేయ మూర్తి ఉన్న పాద గయా క్షేత్రానికి వెళ్ళాము. స్వయం గా ధర్మ పరుడైనా తన వర్గం లోని వ్యక్తుల అధర్మ వర్తనాన్ని ప్రోత్సహించినందుకు, పాప పుణ్యాల ధర్మ చక్ర మార్గానికి అడ్డుగా నిలిచినందుకు త్రిమూర్తులచే  శిక్షింప బడిన గయాసురుడు - శిరో గయ (అధిదేవత విష్ణువు, మంగళ గౌరీ శక్తి పీఠం), నాభి గయ (అధిదేవత బ్రహ్మ, విరజా దేవి శక్తి పీఠం), పాద గయ (అధిదేవత శివుడు, పురుహూతికా శక్తి పీఠం) -  అనే మూడు క్షేత్రాల రూపం లో పూజనీయుడు అయ్యాడు. పాద గయా క్షేత్రం లో ఉన్న సరోవరం లో గయుడి పాదాలు ఉన్నాయని నమ్మకం. ఆ పవిత్ర కోనేటి నీటిని తలపై చల్లుకుని పురుహూతికా అమ్మ గుడి లోకి అడుగుపెట్టాము.



అమ్మ దేదీప్యమానం గా వెలుగుతోంది. అమ్మ తేజస్సు కనుల నిండా, మనసు నిండా పరుచుకుంది. సంధ్యా సమయంలో , దీప కాంతులలో అమ్మ కనులు, వంపులు తిరిగిన కను రెప్పలు, ముక్కెర, బేసరి - ధగ దగా కాంతులు చిమ్ముతున్నాయి. మా అమ్మ, పెద్దమ్మలు లలితా సహస్ర నామ పారాయణం చేశారు, ఈ జగజ్జననిని చూస్తూ - ఎదురుగా కూర్చుని. గంటలు గడిచాయి, అమ్మ ప్రేమ పూరితమైన దర్శనం గంటలను కరిగించేస్తోంది.

ఎన్నో రోజుల నుంచి నాలో అహంకారం జడలు విప్పుకుంది, పురుహూతికా అమ్మవారి విశిష్టత గురించి కొంచెం తక్కువగా ఆలోచించే అజ్ఞానం నాలో పాతుకు పోయి ఉంది. పిఠాపురం లో పురుహూతికా అమ్మవారి తేజస్సు భరించలేక అమ్మ వారి విగ్రహం భూమి లో దాచేశారని, ఇప్పుడు ఉన్న విగ్రహం నవీన కాలం లో ప్రతిష్ట చేసారని ఎక్కడో చదివాను. ప్రపంచం లో ప్రతి అణువులోనూ అమ్మ నిండి ఉందన్న సత్యాన్ని గ్రహించి, అమ్మ ముందు మంచి పుత్రుడి గా ఉండాల్సిన నేను వక్రం గా ఆలోచించాను. స్వయంభూ విగ్రహం కాని ఇప్పటి అమ్మవారి మూర్తి నా '(అ)జ్ఞానానికి' ఆనలేదు (అమ్మా! ఇలాంటి భావన చేసినందుకు నా లాంటి మూర్ఖుడిని క్షమించు). ఒకింత నిర్లక్ష్య భావన అప్పుడప్పుడు జడలు విప్పుతూ ఉండేది. కానీ, ఇప్పుడు ఈ రోజు మళ్లీ మళ్లీ అమ్మ తేజోమయ రూపం మనసు ని లాలిస్తోంది. ఎన్ని గంటల పాటు అయినా కను రెప్ప వెయ్యకుండా చూడాలనిపించే పురుహూతాంబ రూపం మిగతా అన్నిటినీ మరిచిపోయేలా చేస్తోంది. మునుపు రెండు సార్లు అమ్మ వారిని చూసినా కూడా నాకు ఇప్పుడు తాదాత్మ్యత ఎక్కువగా అనిపిస్తోంది.



అక్కడే వెలిసిన కుక్కుటేశ్వర స్వామిని, హూంకారిణి దేవిని (ఈ అమ్మ హూంకారం తో రాక్షస సంహారం చేసిందట), రాజ రాజేశ్వరీ దేవిని (కుక్కుటేశ్వర స్వామి వారి దేవేరి), గణపతిని  దర్శించి దత్తాత్రేయ స్వామి దగ్గరికి వెళ్ళాము. అక్కడ పూజారి గారు నేను అడగకుండానే పురుహూతికా శక్తి పీఠం గొప్పతనాన్ని నాకు వివరించారు (అమ్మకి నా అజ్ఞానాన్ని తుడిచి వెయ్యాలనే సంకల్పం కలిగిందేమో!)


సతీ దేవి శరీర భాగాలలో పీఠ భాగం పడిన క్షేత్రం ఈ పిఠాపురం.

అమ్మ పీఠ భాగాన్ని చూడడం నిషేధం కాబట్టి  అమ్మ ధ్యానరూపాన్ని విగ్రహంగా మలిచి గుడిలో నిలిపి పూజలు  చేస్తున్నారు. ఇప్పటికీ అమ్మవారి పీఠం భూమి లోపల, భూమికి సమాంతరంగా కనీసం అర కిలోమీటరు విస్తరించి ఉందట. పిఠాపురం ఊరి మధ్యలో ఉన్న గ్రామ దేవత ఆలయం వరకు బ్రహ్మాండంగా విస్తరించి ఉందిట. యోగులు, శక్తి  ఉపాసకులు అమ్మవారిని కొలవడానికి జ్ఞాన నేత్రంతో అమ్మవారిని దర్శించగలరు. సామాన్య జనుల కోసం ఈ రోజు అమ్మ వారి శక్తి పీఠ ఆలయం, మూల మూర్తి  సరళంగా ఇలా దర్శనం ఇస్తున్నాయి.


బ్రహ్మాండం అంత అమ్మ వారి చైతన్యం మనసు మొత్తం నింపి వెయ్యగా, ఆత్మ అంతా అమ్మవారి కోసం తపిస్తూ ఉండగా - అక్కడ కాశీ విశ్వేశ్వర స్వామి అన్నపూర్ణాంబ, కాల భైరవ స్వామి, సుబ్రహ్మణ్య స్వామి, దుర్గా దేవి ఆలయాలు చూశాము. దుర్గాంబ ఆలయం దగ్గర దీపారాధన చేశాము. అది సోమవారం, ఆది దంపతులు పాద గయలో విహారం చేస్తూ అక్కడ చాల మంది భక్తులు వెలిగించిన దీపపు కాంతులలో మెరిసిపోతున్నట్టుగా ఉంది. నా లాంటి మంచు కమ్మిన మనిషి లోపల వెచ్చని వెలుగు వ్యాపిస్తున్నట్టు అనిపించింది. పున్నమి చంద్రుడి కాంతిలో, లేత చల్ల గాలుల స్పర్శలో దీపం నిర్మలం గా ప్రకాశిస్తోంది ...  చెవుల నిండా శ్రావ్యం గా వినిపిస్తున్నాయి - "ఓం నమశ్శివాయ ఓం నమశ్శివాయ ఓం నమశ్శివాయ ఓం నమశ్శివాయ ఓం నమశ్శివాయ ఓం శ్రీ మాత్రే నమః" !





హృదయం పావన గౌతమీ తటమ్ - 1

ఎటు చూసినా జలం, ఆకాశం కుండ పోత గా వర్షిస్తోంది.
చుట్టూ జీవం నింపుకుని ఆకుపచ్చ గా కళ కళలు ఆడుతున్న భూమి.

కుంభ వృష్టిలో తడిసి ముద్దవుతున్న నేలని చూస్తుంటే, ఆ నేల ఆసాంతం ఒక పెద్ద శివ లింగం లాగా, ఆకాశం పూజారి గా మారి నిండు గా అభిషేకం చేస్తున్నట్టు గా ఉంది.

మా నాన్న గారి షష్ఠి పూర్తి సందర్భం గా పావన గౌతమీ తీరం లో ఉన్న కొన్ని క్షేత్రాలు దర్శించాలని బయలుదేరాము. మా కుటుంబం లోని పెద్దలు కూడా వచ్చి, ఆ యాత్ర ని మరింత తేజోమయం చేశారు. అక్కడ అన్ని రోజులు కుంభ వృష్టి కురుస్తున్నా మేము ఎక్కడా క్షేత్ర దర్శనం లో తడిసి ముద్దలా మారి, అసౌకర్యానికి లోనవడం జరగలేదు...  ఎక్కడ మేము వాహనం దిగే సమయానికి అయినా జోరు వాన కూడా క్షణాల్లో ఆగిపోయేది. అమ్మవారు మమ్మల్ని ప్రతి చోటా భద్రం గా, ప్రేమ గా వేలు పట్టుకుని నడిపించారు. దానిలో మా గొప్ప తనం ఎంత మాత్రమూ లేదు.

పరమేశ్వరుని ఆత్మ లింగాన్ని తపస్సు తో పొంది, బల గర్వం తో సామాన్యులని, దేవతలని పీడిస్తున్న తారకాసురుడు - స్వామి కుమారుడు అయిన కుమార స్వామి చేతిలో మాత్రమే మరణం పొందాలి. కుమార స్వామి ఎంత నైపుణ్యం తో యుద్ధం చేసినా స్వామి ఆత్మ లింగాన్ని మెడ లో మాల గా ధరించిన తారకుడు అజేయం గా నిలుస్తున్నాడు. ఆత్మ లింగాన్ని ముక్కలు చేసి అప్పుడు కానీ తారకుడిని సంహరించలేను అని గ్రహించాడు కుమార స్వామి. ఆత్మ లింగాన్ని ముక్కలు చేసిన వెంటనే అవి ఎక్కడ పడ్డాయో అక్కడే వెంటనే ప్రతిష్టించబడాలి. 

అమరావతి - బాల చాముండేశ్వరీ  సమేత అమరేశ్వర స్వామి ప్రతిష్ట ఇంద్రుని ద్వారా,
దాక్షారామ - మాణిక్యాంబా  సమేత భీమేశ్వర స్వామి ప్రతిష్ట సూర్యుని ద్వారా,
భీమవరం - రాజ రాజేశ్వరీ  సమేత సోమేశ్వర స్వామి ప్రతిష్ట చంద్రుడి ద్వారా,
పాలకొల్లు - పార్వతీ సమేత క్షీరా రామలింగేశ్వర స్వామి ప్రతిష్ట విష్ణు మూర్తి ద్వారా,
సామర్లకోట - బాలా త్రిపుర సుందరీ సమేత భీమేశ్వర స్వామి ప్రతిష్ట కుమార స్వామి ద్వారా జరిగాయి.

అలా తారకాసుర సంహారం లోకుల కష్టాలని దూరం చెయ్యడమే కాక, పంచారామాల రూపం లో లోక శాంతి కళ్యాణాల కారకమైన ఐదు దివ్య క్షేత్రాల ఆవిర్భావానికి నాంది పలికింది.


పచ్చని కొబ్బరి తోటలు, వరి పొలాల మధ్య ఠీవి గా నిలబడి ఉంది సామర్లకోట కుమారారామ భీమేశ్వర స్వామి ఆలయం. ప్రతి అణువు లోనూ ప్రాచీన శోభ, పవిత్రత నిండిన భూమి అది. క్షేత్ర పాలకుడు కాల భైరవుడు ప్రేమ గా పలకరించాడు. అక్కడ కోనేరు లో జలం  తీసుకుని వచ్చి చెట్టు కింద ఉన్న లింగానికి అభిషేకం చేశాము. ఈ చరా చర ప్రకృతి మొత్తం శివమయం. ఆరుబయట ఆకాశం చేత అభిషేకించ పడుతున్న స్వామి ని నేను క్షణ కాలం పాటు మేఘం లా మారి అభిషేకిస్తున్న అనుభూతి కలిగింది.



సామర్లకోట గుడి ఆవరణ లో స్వామి కి చాలా ఇష్టమైన తుమ్మి పూలు ఉంటాయి. స్వామి వారు రెండు అంతస్తులలో కొలువు తీరారు. కింద అంతస్తులో పానపట్టాన్ని, శివ లింగం ప్రారంభ భాగాన్ని దర్శించాము. శివ లింగం సాక్షాత్ అర్థ నారీశ్వర తత్త్వానికి ప్రతీక -  పానపట్టం అమ్మవారి స్వరూపం లింగం అయ్యవారి స్వరూపం. పైన అంతస్తు లో ఉన్న లింగాన్ని దర్శించడానికి వెళ్ళే మార్గం లో, గుజ్జు రూపం తో బొజ్జ గణపతి ముద్దులు చిందిస్తున్నాడు - అమ్మ నాన్నల దగ్గర పిల్లల గారానికి కొదవ ఏమి ఉంది ?

పంచ అమృతాలతో, నీటితో, వట్టి వేళ్ళ తో, గంధం మొదలైన సుగంధ ద్రవ్యాలతో చేసే శివ అభిషేకం లోకానికి శాంతి కారకం. అభిషేక శోభ లో ఆ తెల్లని స్ఫటిక లింగాన్ని చూసి మనసు అవ్యక్తమైన శాంతి ని పొందింది. మందారాలు, నూరు వరహాలు, శివ లింగ పుష్పాలతో, మారేడు దళాలతో అలంకరించ బడిన స్వామి - అప్పుడే లోకం లో అడుగు పెట్టిన శిశువు తనకు అన్ని విధాల ఆధారమైన అమ్మ ని కళ్ళు విప్పార్చి చూడగా ఎంత అందం గా ఉంటుందో, భీమేశ్వరుడు అంత అందం గా ఉన్నాడు.

ఆ గుడి ఆవరణ లోనే కోటి చంద్రుల చల్ల దనాలని తన చూపు లో నింపుకున్న బాలా త్రిపుర సుందరీ దేవి కొలువై ఉంది, అమ్మ వారి ముందు రాతి మీద శ్రీ చక్రం ప్రతిష్టించబడి ఉంది, అక్కడ కుంకుమ పూజలు జరుగుతున్నాయి. స్వామి గుడి కి వెనుక భాగం లో ఈ క్షేత్రం లో లింగాన్ని ప్రతిష్టించిన కుమార స్వామి ఆలయం ఉంది. అక్కడ కూడా దర్శనం అయ్యాక ఆ గుడి లో జరుగుతున్న అన్నదానం లో తృప్తి గా భోజనం చేశాము. అమ్మ బాలా త్రిపుర సుందరీ దేవి గుడి కి వచ్చే బిడ్డల కోసం - రుచి గా, శుచి గా, కడుపు నిండుగా, ఆప్యాయం గా ఇచ్చిన ప్రసాదం అది.

అక్కడి నుంచి - పాద గయా క్షేత్రం - స్వయం భూ కుక్కుటేశ్వర స్వామి క్షేత్రం -   పురుహూతికా మాత శక్తి పీఠం - స్వయంభూ దత్తాత్రేయ స్వామి క్షేత్రం - దత్తాత్రేయ గురు పరంపర లోని శ్రీ పాద వల్లభ స్వామి జన్మ స్థలం - పంచ మాధవ క్షేత్రాలలో ఒక్కటి అయిన కుంతీ మాధవ స్వామి క్షేత్రం - ఎన్నో విశిష్టతలు కలబోసుకున్న పిఠాపురానికి వెళ్ళాము.

Monday, October 8, 2012

తమాసోమా జ్యోతిర్గమయా

ప్రతి మనిషికీ తనది అయిన ఒక ఆలోచనా ధోరణి ఉంటుంది. తనది అయిన ఒక సంస్కారం ఉంటుంది. దానిని బట్టే ఆ వ్యక్తి మంచి చెడులు భావన చేస్తూ ఉంటాడు.

ఏ ఇద్దరు వ్యక్తుల విలువలూ ఒకేలా ఉండవు. ఇక్కడే విపరీతమైన ఘర్షణ మొదలవుతుంది. ఈ ఘర్షణ పెరిగి పెరిగి - ఒక వ్యక్తి మంచి ఇంకొక వ్యక్తి చెడు గా మారే స్థాయి కి చేరుతుంది.

కానీ మనుషుల వ్యక్తిగత ఇష్టాలు అయిష్టాల కన్నా ఉన్నతమైన స్థాయి లో, మనిషి జీవితం ఎలా ఉండాలి, సంబంధాలు ఎలా ఉండాలి, సాంఘిక జీవితం ఎలా ఉండాలి, రాజ్యం ఎలా ఉండాలి - ఈ విషయాలు అన్నీ వాటికి కావాల్సిన విజ్ఞానం తో సహా మన వేదాల్లో పొందు పరచబడ్డాయి - మతాలకు, ధర్మాలకు అతీతంగా.  అతి సమస్యాత్మక సందర్భాలలో కూడా విజ్ఞతతో ఎలా ముందుకు వెళ్ళాలో స్పష్టం గా వేదాలలో చెప్పబడింది.

ఈ విశ్వం లో పుట్టిన ప్రతి  జీవి సంపూర్ణమైన జీవితాన్ని అనుభవించడానికి, తన జీవిత పరమార్ధాన్ని తెలుసుకోవడానికి, పరమాత్మ ని చేరుకోవడానికి కావాల్సిన అన్ని వనరులని ప్రకృతి ఆ జీవి పుట్టిన నాడే సిద్ధం చేసి ఉంచుతుందట ! జీవికి - ముఖ్యం గా మనిషి కి పరమాత్మ దత్తమైన స్వేచ్ఛ ఉంటుంది. దానిని ఆ వ్యక్తి ఎంత సద్వినియోగం చేసుకుంటాడు అన్న విషయం మీదే ఆ వ్యక్తి చైతన్య స్థాయి ఏర్పడి ఉంటుంది. ఆ చైతన్య స్థాయి ని బట్టి ఆ మనిషి ఆలోచన, ప్రవర్తన ఉంటాయి. వ్యక్తుల లోని ఈ చైతన్య స్థాయిలలో తేడాలు, ఆ తేడాలని అంగీకరించలేని వ్యక్తులు - ఈ ప్రపంచం లోని అన్ని సంఘర్షణలకు, ఘర్షణలకు కారణం. 

నేటి కాలం లో ప్రతి మనిషి మనిషి కీ మధ్య పెద్ద పెద్ద అడ్డు గోడలు; ప్రేమ, అభిమానం పంచుకోవడానికి వీలు లేనంత మందమైన అడ్డు గోడలు. ఆహారం లో మార్పు, జీవన విధానం లో మార్పు, సాంఘిక జీవనం లో మార్పు, కుటుంబ జీవనం లో మార్పు. అన్ని రకాల రుగ్మతలకి మందు లా పని చేసే ఆధ్యాత్మిక, సాంస్కృతిక వారసత్వాన్ని మన చేతులతో మనమే నాశనం చేసుకున్నాం. చిన్న పిల్లలని సంరక్షణా కేంద్రాల పాలు చేశాము, పెద్ద వాళ్ళని వృద్ధాశ్రమాల పాలు చేశాము,  వైవాహిక జీవన ఔన్నత్యాన్ని ఒత్తిళ్ళు అహంకారాల కింద ఉంచేశాము, అక్క చెల్లెళ్ళు అన్న తమ్ములను పిలుపుకి అందనంత దూరం లో పెట్టాము, భగవంతుడి దగ్గర సహేతుకం కాని కాని కోరికలకి కూడా బేరం పెట్టాలని చూశాము - మొత్తం గా ధార్మికం గా పేదరికం అనుభవిస్తున్నాం. మనిషి ని దైవ స్వరూపం గా మార్చే సుగుణాలు - ప్రేమ, దయ, కరుణ, క్షమ  - అన్నీ వదిలి బ్రతుకుతున్నాము.

క్షమ - ఉత్కృష్టమైన సుగుణం. మన భారతీయ ఆధ్యాత్మిక జీవనానికి ఆభరణం. క్షమ లేని ఆధ్యాత్మిక సాధన జీవం లేని శరీరం లాంటిది.

అలాగే ఆధ్యాత్మిక జీవనం కుటుంబ, సాంఘిక జీవనాలకు భిన్నమైనది కాదు - అది వాటితో మమేకమయ్యే అంతర్లీన ప్రవాహం.


ఆధ్యాత్మిక సాధన అనేది జీవితం లో అన్ని దశలు దాటిన తర్వాత ఆలోచించాల్సిన దశ కాదు. మనిషి పుట్టుక నుంచీ జీవితపు చివరి క్షణం దాకా ప్రతి దశ లోనూ మార్గదర్శకం గా నిలిచే జ్ఞానం అది. ఈ విషయాన్ని అర్థంచేసుకోవడం లో నేటి మనుషులు విఫలం అవుతున్నారు. వారు జీవితాన్ని దిద్దుకోలేక, తరువాత తరాలకు ఆ జ్ఞానాన్ని, వారసత్వాన్ని అందించలేక - పొరపాటు మీద పొరపాటు చేస్తున్నారు.

అందుకే నేటి మనిషి క్రూరం గా మారిపోయాడు. తన ఇష్టానికి వ్యతిరేకం గా జరిగే దేనినీ తట్టుకోలేనంత అసహనం పెరిగింది. తన చుట్టూ ఇనుప గోడలు కట్టుకుంటున్నాడు. త్యాగం లో ఉండే ఆనందం పూర్తిగా మర్చిపోయాడు. తనకి అనుకూలం గా లేని మనుషుల మీద, పరిస్థితుల మీద అంతు లేని ద్వేషాన్ని పెంచుకుంటున్నాడు, ఆ ద్వేషమే శ్వాస లాగ బ్రతుకుతున్నాడు. దైవంతో తనకున్న అత్యున్నతమైన బంధాన్ని పదిల పరుచుకునే అవకాశాలని విస్మరిస్తున్నాడు. ఆత్మోన్నతి కోసం సాధన చెయ్యాల్సిన అవసరాన్ని మరచిపోతున్నాడు. ఒక్క మాటలో - మనిషి మనిషిలా బ్రతకడం లేదు.

ఎదుటి వారి ప్రవర్తన మనలని బాధ పెడితే స్పష్టం గా చెప్పాలి... మన వైపు నుంచి ఏమన్నా పొరపాటు ఉంటే మనను మనం దిద్దుకోవాలి. మంచి ని మంచి గా ఆదరించాలి, చెడు ని వ్యతిరేకించాలి, కాని ఆ వ్యతిరేకించడం లో క్రూరత్వం ఉండకుండా ప్రవర్తించాలి. ఎన్ని ప్రయత్నాలు చేసినా మారలేని మనుషులను ద్వేషించకుండా, ఆ మనుషుల చైతన్య స్థాయిలను మనం అర్థం చేసుకోవాలి. వారికి మేలు జరగాలని, మానసికం గా పరిణితి చెందాలని దేవుడిని స్వచ్చమైన మనసుతో ప్రార్థించాలి.


తల్లికి అందరు బిడ్డలు సమానం అయినా కూడా, ఏదైనా లోపం ఉన్న బిడ్డని ఎక్కువ గా ఆదరించినట్టు - అజ్ఞానం వలన మనలను బాధించే వారు ఆ అజ్ఞానం నుంచి బయట పడాలని వారి కోసం మనం ఎక్కువ గా ప్రార్థించాలి.
మన జీవితం అంటే కేవలం మనమే కాదు, మన చుట్టూ ఉన్న అన్ని మంచి చెడుల కలయిక. 

ఇది అంతా ఒక విషయం లాగ చెప్పుకోవడానికి బాగుంటుంది కాని దీన్ని ఆచరించి చూపించడం చాలా చాలా కష్టం. ముఖ్యం గా మన సాత్విక ఆలోచనని ఎదుటి మనిషి అశక్తత గానో, అనివార్యం గానో భావిస్తే మన సహనానికి అది నిజమైన పరీక్ష అవుతుంది. ఆత్మ రక్షణ కి, ఆత్మ విశ్వాసానికి ఉన్న అంతరం చాల చిన్నది, సన్నది. సరి అయిన సమయం లో, సరి అయిన తీరులో, సరి అయిన దృక్పధం తో ముందుకు వెళ్ళడం అనేది సామాన్యమైన విషయం కాదు, చాలా చాలా సాధన కావాలి, పరిణితి కావాలి, ఓర్పు కావాలి; అన్నిటి కన్నా ఎక్కువ గా మనస్సు ని, శరీరాన్ని, ఆత్మ ని సంయమనం తో ముందుకి నడపడానికి దైవ బలంకావాలి.

పరమేశ్వరా ! ఆ బుద్ది నీ, పరిణితి నీ,విచక్షణ నీ అందరికీ ప్రసాదించు.

ద్వేషాన్ని ప్రేమ తోనూ, చీకటి ని వెలుగు తోనూ, అజ్ఞానాన్ని జ్ఞాన జ్యోతి తోనూ జయించగల సాధన ని ప్రసాదించు.

అసతోమా సద్గమయ తమసోమా జ్యోతిర్గమయ మృత్యోర్మా అమృతం గమయ ...

Thursday, September 20, 2012

ఆది శక్త్యాత్మిక అన్న పూర్ణ

అన్నం పరబ్రహ్మ స్వరూపం.

అన్నం లో ప్రాణ శక్తి ఉంది.

అన్నం సాక్షాత్ అమ్మవారి స్వరూపం.

ప్రపంచం లో అన్ని ఉపాధుల జీవనోపాధులకి మూలం అన్నం.

ఇది నేను పెద్ద వారి నుంచి విన్న మాట !  మనకి ఆకలి వేళకి ఎవరన్నా ఎదురొచ్చి శుచి గా వండిన ఆహారాన్ని  పెడతానంటే ఎటువంటి ఆహంకారం  లేకుండా ఆనందం గా, తృప్తి గా ఆ భోజనాన్ని అంగీకరించాలి. సాక్షాత్ కాశీ అన్నపూర్ణేశ్వరి ఆ మనిషి రూపం లో మనకి అన్నం పెడుతున్నట్టు అర్థం.

ఒక వ్యక్తి కి పది లక్షలు ఉంటే కోటి రూపాయలు లేవని బాధ ఉండొచ్చు. ఒక వ్యక్తి కి తల దాచుకునేందుకు ఒక ఇల్లు ఉన్నాక ఇంకో పెద్ద ఇల్లు కావాలన్న ఆశ రావచ్చు. ఆకలి తో ఉన్న మనిషికి అన్నం పెడితే - కడుపు నిండితే చాలు - తృప్తి వస్తుంది.

సాధ్యమైనంత  వరకు "అన్నం వద్దు " అనే మాట కానీ ఆలోచన కానీ ఎవరికీ ఉండకూడదు. అన్నాన్ని ఏ నాడూ అవమానించకూడదు, తిరస్కరించకూడదు.

అన్నిటి కన్నా ముఖ్యం - "అన్నాన్ని ఎన్నడూ వృధా చెయ్యకూడదు"

Tuesday, February 28, 2012

సింహాచలం సంపెంగ

ప్రతి జీవి ఈ భూమి మీద ఏదో ఒక కర్తవ్యాన్ని నిర్వహించేందుకు వస్తుంది. భగవంతుడు ఆ జీవి ని భూమి మీద ప్రాణి గా సృష్టించే ముందు ఆ జీవి ఏ శరీరం లో ప్రవేశించాలి, ఎలా జీవించాలి, తన పూర్వ కర్మల ఫలాన్ని ఎలా అనుభవించాలి, భూమి మీద ఎటువంటి ఈశ్వర దత్తమైన కార్యాన్ని నెరవేర్చాలి, ఎప్పుడు తిరిగి ఈశ్వరుడి సన్నిధి లోకి చేరుకోవాలి - అన్నీ సంకల్పం చేసి పంపుతాడని నా నమ్మకం.

ప్రతి జీవి కి లోలోపల పరమాత్మ వెలిగించిన జ్ఞాన జ్యోతి తో పాటు, తన ఆలోచన వివేకాలని అనుసరించే స్వేచ్ఛ కూడా ఉంటుంది. ఆ స్వాతంత్ర్యాన్ని జీవుడు సద్వినియోగం చేసుకుంటాడా, తను చెప్పిన మార్గం లోనే నడుస్తున్నాడా అని ఆ సర్వ సాక్షి ఈశ్వరుడు గమనిస్తాడట.

మనిషి జన్మ ఎత్తిన వారు ఎవరు తప్పులు చెయ్యకుండా, పొరపాటు పడకుండా ఉండరు. కాని ఆ నీడ నుంచి బయటకు వచ్చి ఈశ్వరుడు లోపల వెలిగించిన జ్ఞాన జ్యోతి ని గుర్తించి తన మార్గం తను వెతుక్కోగలిగిన జీవుడు ధన్యుడు. ఈ లోపు మనిషి ని - కోపం, ద్వేషం, అసూయ, కామం, లోభం, అవమానం, విశ్రున్ఖలత్వం, అహంకారం, మోహం, న్యూనత - అన్నీకలిపి లో లోన కల కలం సృష్టించి జ్ఞాన జ్యోతి ప్రకాశాన్ని లోలోపల అణచి వేసి, ధర్మ బద్ధం గా జీవించనీకుండా అడుగడుగునా అడ్డు పడుతుంటాయి.

ఇది సర్వం మాయ. దీన్ని తెలుసుకుని లోపల విషయాన్ని గ్రహించి ప్రాపంచిక జీవితాన్ని సాధ్యమయినంత తక్కువ గా వికారాలకు లోనవుతూ - భగవంతుని ప్రార్ధన తో ఆ వికారాలని ఒక్కొక్కటి గా జయిస్తూ - ప్రతి క్షణం లో ఈశ్వర సాన్నిధ్యాన్ని అనుభవించ గల స్థితి పొందిన జీవుడు అత్యంత భాగ్య శాలి.

దారుణమైన అజ్ఞానం లో పడి కొట్టుకు పోతున్న ప్రతి జీవుడిని తండ్రి ఈశ్వరుడు సంస్కరించి తన మార్గం లోకి తనే నడిపించడానికి ఎప్పుడూ తన చేయూత ఇస్తూనే ఉంటాడు. వివేకం తో, భక్తితో ఆ తండ్రి చెయ్యి అందుకున్న జీవుడు ధన్యుడు.

లేకపోతే ఎన్నో తప్పులు చేసి, తెలియక కూడా ఎన్నో పాపాలు మూట కట్టుకుని, అహంకారం లో కొట్టు మిట్టాడుతూ ఉన్న నా లాంటి మనిషి ని - నా సింహాచలం అప్పన్న అక్కున ఎలా చేర్చుకున్నాడు ? అది కేవలం ఆయన దయ మాత్రమే ! నా తండ్రి ఆయనే పిలిపించి దర్శనం ఇస్తారు, తప్పు చేస్తే చిన్న మొట్టి కాయలు వేస్తారు, తన పాదాల దగ్గర మేము తల దాచుకోవాలని ఆయనే పిలిచి ఇల్లు ఇచ్చారు.

ప్రతి క్షణం ఎటు వంటి స్థితి లో ఉన్నా కూడా ఈశ్వర సాన్నిధ్యాన్ని అనుభవించడమే జన్మ లో, జన్మ రాహిత్యం లోను ముఖ్య విషయం. ఎప్పుడూ ఆలోచన లలో ఊగిస లాడే చిన్న కోరిక - ఈ సారి జన్మ అంటూ ఉంటే సింహాచలం కొండ మీద అడవి సంపెంగ చెట్టునై పుట్టాలి. ఒక్క సారి అయినా పువ్వుల్లాగా పూసి - నా తండ్రి వరాహ లక్ష్మీ నరసింహ స్వామి మెడలో అలంకరించ బడాలి.

Saturday, February 18, 2012

అష్టా దశ శక్తి పీఠాలు

అష్టా దశ శక్తిపీఠాలు - మన అఖండ భారతా వని చేసుకున్న అనంత పుణ్య ఫలాలు
అమ్మ భూ మండలం లోని తన బిడ్డలందరికీ మరింత చేరువ అయ్యేందుకు తనకు తాను గా వెలిసిన దివ్య క్షేత్రాలు

లంక లో శాంకరీ దేవి
కంచి లో కామాక్షి
ప్రద్యుమ్న దేశం లో శృంఖలా దేవి
క్రౌంచ పట్టణం లో చాముండేశ్వరి
అలంపురం లో జోగులాంబ
శ్రీశైలం లో భ్రమరాంబిక
కొల్హాపురం లో మహా లక్ష్మి
మాహుర్ లో ఏక వీరిక
ఉజ్జయిని లో మహా కాళి
పీఠికా పురం లో పురుహూతికా
ఓడ్యాన దేశం లో గిరిజా దేవి
దక్ష వాటిక లో మాణిక్యాంబ
హరి క్షేత్రం లో కామాఖ్య దేవి
ప్రయాగ లో మాధవేశ్వరి
జ్వాలాముఖి లో వైష్ణవీ దేవి
గయా లో మంగళ గౌరి
వారణాసి లో విశాలాక్షి
కాశ్మీర్ లో సరస్వతి

ఎక్కడ చూసినా అమ్మే ! బిడ్డల ఆలనా పాలనా చూసేందుకు ఎన్నో చోట్ల అన్ని రూపాలలో భూమి మీద అవతరించింది అమ్మ !

ఒక బిడ్డ ని కనడానికి తన ప్రాణాన్ని పణం గా పెట్టి చిన్ని జీవాన్ని ఈ లోకం లోకి తీసుకుని వచ్చి, తన రక్తాన్ని పాలు గా మార్చి , ఆ చిన్న జీవాన్ని సంపూర్ణమైన జీవి గా నిలబెట్టే ప్రతి తల్లి లోను ఆ అమ్మవారి అంశ ఉంది. అమ్మ తనాన్ని అత్యంత పవిత్రం గా భావించే ఈ కర్మ భూమి లో, తల్లి ని మించిన దైవం లేదని వేదాలు సైతం ఘోషించే ఈ పుణ్య భూమి లో పుట్టిన ఏ వ్యక్తి కి అయినా అత్యంత ముక్తి దాయకమైన శక్తి పీఠాలు పద్దెనిమిది మాత్రమే కాదు. ప్రతి వ్యక్తి కీ కని పెంచిన అమ్మ ఒడి అతి పవిత్రమైన శక్తి పీఠం. సాక్షాత్ అమ్మవారి అంశ ని ఈ మట్టి మీద జన్మ ని ఎత్తే ప్రతి ప్రాణి కి అనుభవేకం చేసే అత్యంత గొప్పది అయిన శక్తి పీఠం !!

Tuesday, May 17, 2011

సురుటుపల్లి వైభవం




సురుటుపల్లి - ఆంధ్ర ప్రదేశ్ లోని చిత్తూర్ జిల్లా లో ఉన్న చిన్న గ్రామం. దేవ దానవులు క్షీర సాగర మథనం చేసే సమయం లో హాహాహలం పుట్టి లోకాలన్నీ దహించుకు పోతున్న భయంకరమైన సమయం లో లోకాలన్నీ వెళ్లి పరమేశ్వరుడిని రక్షణ కోసం వేడుకున్నాయి. లోకాల రక్షణ కోసం ఆ విషాన్ని తాను సేవించడానికి సిద్ధ పడ్డాడు ఆ బంగారు తండ్రి. బిడ్డల రక్షణ కోసం ఎంత విపత్తు ని అయినా ఎదిరించడానికి సిద్ధ పడే ఆ తండ్రి ని జగన్మాత అనుసరించింది. కాలకూట విషం ఎంత భయంకరమైనది అయినా తన మాంగల్యం మీద తనకి ఉన్న నమ్మకం తో భర్త కి తన అంగీకారం తెలిపింది అమ్మవారు.

మనసే అసలు సిసలు మాంగల్యం - ఆమె మనసంతా ఆయనే నిండి ఉండగా - సాక్షాత్తు పసుపు కుంకుమ ల స్వరూపమైన అమ్మ వారికి తన మాంగల్యం మీద అంత నమ్మకం ఉండటం లో ఆశ్చర్యం ఏమీ లేదు.

స్వామి వారు హాలాహలాన్ని పుచ్చుకున్న కొద్ది సేపటి వరకు మైకం కమ్మేసింది. అప్పుడు అమ్మవారు పరుగున వెళ్లి అయ్య వారి తలని తన ఒడి లోకి తీసుకుని విశ్రాంతి గా శయనింప జేసింది. విషం స్వామి గొంతు దాటి కడుపు లోకి వెళ్తే అక్కడ ఉన్న లోకాలు దహించుకు పోతాయని గ్రహించి స్వామి వారి కంఠం దగ్గర చిన్న గా నొక్కి ఆ హాలాహలం అక్కడే ఉండి పోయేలా ఆపింది. స్వామి తేరుకుని అన్ని లోకాలు హాలాహలం నుంచి రక్షించ బడ్డాయని గ్రహించి నటరాజు గా అక్కడ ఆనంద తాండవం చేశారు. ఇంత అపురూపమైన ఘట్టానికి వేదిక సురుటుపల్లి.


తండ్రి శ్రీ రాముని మీద యుద్ధం చేసిన దోషం పోగొట్టు కోవడానికి లవ కుశులు ఇక్కడి పల్లి కొండీ శ్వర స్వామిని సేవించారు. వాల్మీకి మహా కవి రామాయణ రచన ప్రారంభించ బోయే ముందు ఈ స్వామి ని సేవించారు. స్వామి ని, అమ్మవారిని దర్శించుకునేందుకు ఆ నాడు అందరు దేవతలు భూమి మీద అడుగిడిన దివ్య స్థలం సురుటుపల్లి. అమ్మ సర్వ మంగళ ఒడిలో స్వామి శయనించి ఉండే ఏకైక మూల విరాట్టు సురుటుపల్లి లోనే ఉంది.


నిజానికి అమ్మ పార్వతి దగ్గర భక్తుడు చేసే ముదిగారం కన్నా, తండ్రి పరమ శివుడి పాదాల దగ్గర భక్తుడికి దొరికే కనికరం కన్నా ఈ అమృతం అంత ఘనమైనది ఏమీ కాదు. ఈ విషయాన్ని ఆ నాడు అందరు జ్ఞానులు ఎందుకు గమనించలేకపోయారు ? బహుశా ఈ రూపం లో పరమేశ్వర తత్వాన్ని, జగన్మాత మంగళ కరమైన స్వరూపాన్నిలోకానికి చాటి చెప్పే ప్రయత్నం చేశారేమో !

స్వామి దయ కి, అమ్మవారి ఆత్మ విశ్వాసానికి, ఆది దంపతుల అనురాగ పూరిత బంధానికి వేదిక గా నిలిచిన సురుటుపల్లి -సఖ్యత లేని దంపతుల ని, అనుకూలత లేని దాంపత్యాన్ని సరిదిద్ది - దర్శించిన దంపతులకి జన్మ జన్మ ల పాటు నిలిచే అన్యోన్యత ని ప్రసాదించే అపురూప క్షేత్రం. మైకం తో అలసి ఉన్న స్వామి అమ్మ వారి ఒడి లో పడుకుని ఉండగా, అమ్మవారి మంగళ సూత్రపు మంగళ కరమైన గల గలలు స్వామి కి అలసట తీర్చిన ఆ పుణ్య భూమి - భార్య భర్త ల అన్యోన్య అనురాగానికి, ఆదర్శ దాంపత్యానికి నిలువుటద్దం.

***********************************************

మంగళముకే మంగళం మా సర్వ మంగళ
నిఖిలమై నిలిచినట్టి నిత్య సత్యపు కళ
శివమే సూత్రమైన తాళిబొట్టు చలువల
ఈశుతల వాల్చినాడు ఆమె ఒడి కోవెల

పార్వతమ్మ కనులలో ముదిగారాల కన్నా
శంకరయ్య పదము లందు కనికారాల కన్నా
ఏమిటంత ఘనమంట అమృతపు భోగమంట
పాల సంద్రము చిలికి పుట్టించే గరళ మంట
నిప్పుతో చెలగాటకు నిక్కుతున్న బిడ్డలను
కరుణ జూచి కమలాక్షి కాచుకొన వచ్చెను


మేలిమి మనసే మరి - సిసలు మాంగల్యము
అది యంత నిండెను పరమేశు ధ్యానము
ఎంత గా మది నమ్మెను నా తల్లి పార్వతి
పసుపు కుంకుమ రూపు పరమేశు ప్రియ సతి
మంచు కొండ సామి మింగే కాలకూట గరళము
చలువ పొంది సేద దీరె లోకమందు జీవము

మైకమే కమ్మినది మా దొడ్డ సామి కి
ఒడి చేర్చి లాలించే బంగారు నాయకి
కడుపు లో లోకాలు దాచుకున్న అయ్యని
నీల కంఠం జేసే అమ్మ నారాయణి
ఎంత ఎంత జెప్పుదును అమ్మ అయ్య ల దయను
సురుటుపల్లి సీమ లోని కడుపు చలువ కథలను